Thodi si raat

ik raat likhi thi tumne kabhi
thodi to maine padh li hai
thodi padi hain dil me mere
thodi palkon ne pakad li hai

thodi si raat bitayi hai
thodi si raat bachayi hai
tumhe bulane,lubhane ko
aasmaan pe thodi bichayi hai
baaki ki raat?
tum aao to sahin!

thodi si tumne ugayi thi
thodi si maine jagayi hai
seene me saanjh bujhane ko
thodi si raat lagayi hai
baaki ki raat?
tum aao to sahin!

thodi khaabon se uthai thi
thodi galiyon me bithai hai
tanha sone ki aadat to gayi
bistar pe thodi litai hai
baaki ki raat?
tum aao to sahin!

tukdon me raat sajaate hi
thodi si garaj-ke guzar gayi
kishton me raat bujhaate hi
thodi si palat-ke lipat gayi
baaki ki raat?
arey... tum aao to sahin

thodi udhaar me baati thi
sood me thodi aur mili
girte dhuaan me udti boondein
thodi si aur deke chali

kya karoon
pehlu me itni hai

tum...
aao to sahin