230. Bablu ke shauk

 hatheliyon me apni kismat padhna
 paheliyon me apni hasrat likhna

 nazmon me deewano sa ibaadat karna
 boson me dil ki inaayat likhna

 har shab kuch puraane khat padhna
 har subah ik nayi muhabbat likhna


--

 aye haye haye haye... mu-ha-bbat!!
 bevkoof!
 tu aise chakkar me mat padiyo, bablu
 kahe deti hoon, haan!
 ye pyaar-vyaar badi mahangi lat hai

 random nazron me green signal mat padhna
 dil aa jaaye kahin to love letter mat likhna

 aise dangerous shauk paalte hain jo
 woh aur honge fursat-waale.
 hamare paas in sab ke liye
 na time hai
 na paise

 ye le paise, sethji ke dukaan pe jaa
 janvari ka udhaar chuka
 kah dena, pichle maheene ka, kuch hafton me de denge

 har subah ik nayi muhabbat likhna!!
 yahaan meri jaan nikle jaa rahi hai,
 aur yeh nawaab saab bade aaye, muhabbat likhne wale
 huh!!

 do joote padenge to
 saare daure set ho jaayenge, haan!